கணவன் மனைவி உறவின் மகத்துவம்

 

கணவன்  மனைவி உறவின் மகத்துவம்

 

        கணவன், மனைவி உறவு நன்றாக இருக்கும்போதுதான் அவர்கள் நல்ல பெற்றோர்களாக இருக்க முடியும். இல்லற வாழ்க்கையில், இல்லற உறவில் மனைவியின் பங்கு அதிகம். மனைவி, தலைவியாக, அமைச்சராக, ஆலோசகராக, அடியாளாக, தோழியாக எனப் பலவிதப் பொறுப்புகளை வகித்து குடும்பத்தைக் கோயிலாக்கக் கூடிய சக்தி படைத்தவளாகிறாள். அத்தகைய மனைவியின் உணர்வினை மதித்தவர்கள் வாழ்க்கையில் உயர்ந்திருக்கிறார்கள் என்று வரலாறு கூறுகிறது.

·                      அமெரிக்க ஜனாதிபதி ஆண்ட்ரூ ஜாக்ஸன் திருமணமான போது கல்வி அறிவு இல்லாதவர். திருமணத்திற்குப் பிறகுதான் மனைவியின் ஊக்கம் அவரை உயர்பட்டம் பெறவைத்தது. ஜனாதிபதியாக உங்களால் முடியும் என்ற உணர்ச்சிமிக்க வார்த்தைகள் ஜனாதிபதியாக்கியது.

·                   ஷாஜஹான், மும்தாஜ் உள்ள காதலால் உலக அதிசய தாஜ்மகால் உருவானது என்று கூறப்படுகிறது. ஷாஜஹானுக்குக் குழப்பமான பல சூழ்நிலைகளில் காப்பாற்றிய அந்த உண்மை உறவின் நன்றிக்காக எழுப்பப்பட்டதே அந்த நினைவாலயம்.

·                                  அறிவாளி சர்ச்சிலுக்கு அந்தரங்க ஆலோசகர் அவர் மனைவி. இன்று விளங்கும் ஃபோர்டு காரை உருவாக்கிய ஹென்றி ஃபோர்டு, எடுத்த முயற்சி, ஆராய்ச்சிகள் தோல்வியுற்று இழப்பு ஏற்பட்ட போது, உற்றார், உறவினர் கேலி செய்து புத்தசாலித்தனமாகத் தொழிலை மாற்ற ஆலோசனை கூறினர். மனைவி தந்தத் தளராத ஊக்கமே அவரைத் தலை நிமிர வைத்தது.

         ஆனால் இன்று புரட்சிப் பெண்கள் தனிப்பட்ட முறையில் தனியாகச் சாதனைகளைப் படைத்து வருகிறார்கள். ஆண்களைச் சார்ந்திருக்கக் கூடாது எனத் தவறாகக் கருதுகிறார்கள். இரண்டு சக்கரங்கள் இணைந்து சுழன்றால்தான் வண்டி நன்றாக ஓடும். அதுபோல் கணவன், மனைவியைச் சார்ந்து வாழும்போது தெய்வீகம் பிறக்கிறது. Husband and Wife neither dependent or independent but interdependent. இதைப் புரிந்து கொள்ளும்போதுதான், தான் என்கின்ற ஆணவமும் ஏற்படாது, நாம் என்கின்ற ஒற்றுமை உறவு ஏற்படும்.

          மதுரை மீனாட்சி, ஆண்களை வெல்லப் புறப்பட்டு வழி முழுவதும் வெற்றி பெறுகிறாள். கைலாய மலையில் சிவனைக் கண்டவுடன் அமைதி பெறுகிறாள். மன்மதனை எரித்து, அவரின் கரும்பு வில்லை வென்ற சிவபெருமான் பார்வதியிடம் அமைதியுற்று, வென்ற கரும்பை பார்வதிக்கும் பரிசாகக் கொடுக்க இராஜராஜேஸ்வரியாகிறார். ஆகவே பார்வதி, சிவன் ஒருவரிடம் ஒருவர் தோற்றார்களா? இல்லை வென்றார்கள் என்பதுதான் உண்மை. இதுதான் கணவன் மனைவி உறவின் உண்மை ரகசியம்.

          வெளிநாடுகளில் காதலித்து முடிந்தபின் திருமணம் செய்கிறார்கள். அத்திருமணத்தின் ஆயுள் தெரியாது. நமது நாட்டின் இல்லறப் பெருமையே திருமணத்திற்குப் பின் காதல் தொடங்குகிறது. கணவன், மனைவி இருவரிடம் உள்ள, உள்ள உணர்வுகளை உணர, உணர, அன்பும் இன்பமும் மேலோங்குகிறது. அந்தப் புனித அன்பால் நாளடைவில் உடல் மறைந்து, உருவம் மறைந்து உள்ளம் மட்டும் எஞ்சி நிற்க உறவுகள் உயர்ந்து நிற்கிறது.

          ”ஒருவர் தென்றலாகும் போது, மற்றவர் மலராவார்

          அங்கு வாழ்க்கை மணம் வீசும்

          ஒருவர் பாடலாகும்போது மற்றவர்

          புல்லாங்குழலாவார் அங்கு இசை பிறக்கும்

          ஒருவர் கல்லாகும்போது மற்றவர் உளியாவார்

          அங்குச் சிற்பம் உருவாகும்”

இதனால் நமது நாட்டு தெய்வீகத் திருமண உறவு, இனிமையாக இறுதி வரை வாழ்கிறது. கணவனோ, மனைவியோ உணர்ச்சி மிக்க உறவால் பழகும்போது வாழ்க்கை வழுவழுப்பாகிறது. தண்ணீர், பாறையைக் காட்டிலும் மென்மையானது. ஆனால் அத்தண்ணீர் இடைவிடாத இயக்கத்தால், சொரசொரப்பான பாறையின் முகத்தைக்கூட வழுவழுப்பாக்கிவிடும். இத்தகைய உண்மையான, உணர்ச்சி மிகுந்த உறவாகக் கணவன், மனைவியின் உறவு இருக்கவேண்டும்.

          நபிகள் நாயகம் இடதுகைத் தண்ணீர் வலது கையையும், வலது கைத்தண்ணீர் இடது கையையும் கழுவுவது போல் இருக்க வேண்டும் என்கிறார். அவர்கள் இருவரும் இணைந்து பிள்ளைகளுக்கு, குடும்பத்துக்கு, உலகுக்கு உதவ்வேண்டும். இப்படிப் பிறருக்காக வாழ்வதே இல்லற உறவாகும்.