புலிப்பல் தாலி

 

புலிப்பல் தாலி

‘புலியின் பல்லைக் கோர்த்து செய்த கழுத்தணி எனவும் பொன்னுடைத் தாலி’ என்றும், ‘பொன்னோடு புலிப்பற் கோத்த புலம்பு மணித் தாலி’ என்றும் அழைக்கப்பட்டது. வீரத்தின் விளைவாக பெறும் புலிப்பல்லைப் பச்சிளம் சிறுவர்கட்கு அணிவித்தமை, வீரத்தை இளமையிலேயே உணரும் உணர்வைத் தூண்டுதல் என்ற வகையினிடம் பெற்றிருந்தது. சிறுவர், சிறுமியர் இருபாலருக்கும் புலிப்பல் தாலி அணிவிக்கும் வழக்கம் பண்டை குறிஞ்சி நில மக்களாகிய கானவரிடையே நிலவிய ஒன்று.

புலிப்பல் பெற்ற முறையைச் சிலப்பதிகாரம்,

”மறங்கொள்வயப் புலி வாய்பிளந்து பெற்று

 மாலை வென் பற்றாலி நிரை பூட்டி”

என்று வீரமிக்க வலிய புலியை கிழித்துப் பெற்றமை விளக்கப்பட்டுள்ளது. வேட்டையாடிப் பெற்ற  புலிப்பல் வீரத்திலன் விளைவால் கிடைத்தப் பொருள். எனவே வீரத்தின் அறிகுறியாகத் தம் மக்களுக்கு அணிவித்தவர் என்பதும் புலனாகிறது. பெரியபுராணத்தில்,

          ”ஆண்டெதிர் அணைந்து செல்ல விடும்

                                                அடித் தளர்வு நீங்கிப்

         பூண்டிதழ் சிறு புன்குஞ்சிப் புலியுதிர்ச் சுட்டி சாத்தி

         மூண்டெழு சினத்துச் செங்கண் முளவு முள் அரிந்துகோத்த

         நாண்டரும் எயிற்றித் தாலி நலங்கினர் மார்பில் தூங்க”(பெரிய.10:20)

எனக் கூறப்படுதலால் அறியலாம். மேலும் குழந்தைக்கு ஓராண்டாக இருக்கையில், தளர்நடைப் பருவத்தில் அணியப்பெற்ற அணி இது என்பதும் அறியமுடிகிறது.

இவற்றைத் தவிர பண்மணிச் சதங்கையொலிக்கும் அரைநாண் அணிவித்தனர். யானை மருப்பினால் ஆன தண்டையைக் காலிலே ஒலிக்கப் பூட்டினர். காப்புக் கலன்கள் என இவ்வணிகள் அணியப் பெற்றிருந்தமை சுட்டப்படுகிறது. இதனை,

”பாசொளி மணி யோடார்த்த பன்மணிச் சதங்கை ஏங்கக்

காசொடு தொடுத்த காப்பு கலன்புனை

                                                அரைஞாண் சேர்த்தித்

         தேசுடை மருப்பில் தண்டை செறிமணிக் குதம்பை மின்ன

        மாசறு கோலங் காட்டி மறு கிடையாறும் நாளில்” (பெரிய.10:20)

எனச் சுட்டுவார். சதங்கை, காசொடு தொடுத்த காப்புக் கலன்கள் இணைத்துக் கோர்த்த அரைநாண் குழந்தையின் இடையில் கட்டப்படுதல் கண்ணேறு படாமல் குழந்தையைப் பாதுகாக்கும் என்ற நம்பிக்கைச் சார்ந்த செயலாக இடம் பெற்றிருந்த நிலையையும் உணர முடிகிறது.

          மறக்குல மகளிரும் புலிப்பல் தாலியை அணிந்த செய்தி அறியப்படுகிறது. கண்ணப்பரின் தாய், தந்தை இருவரும் மறவர் குல மரபு பேணிப் புலிப்பல் தாலியை, அணிந்திருந்தனர். வீரத்தின் விளைவாகப் பெற்ற பொருளை, வீரத்தைப் பறைச்சாற்றும் நிலையிலும், மங்கலச் சின்னமாகவும் கழுத்தில் அணிந்திருக்கலாம் என்று எண்ணத்தைத் தோற்றுவிக்கிறது.

          புலிப்பல் தாலியை. அழகுக்காக அணியப்பட்டது என்பதை விட நம்பிக்கையின் அடிப்படையில் மனிதன் பிற இயற்கைக் கூறுகளின் பாதிப்பிலிருந்து தன்னைப் பாதுக்காத்துக் கொள்ள கைக்கொண்ட காப்பிணியாகக் கருதலாம். கலைக் களஞ்சியம் – தொகுப்பு 12.ப.1030

        காப்பியங்களில் மறவர் குலம் சார்ந்த சிறார்கள் அணிந்த குறிப்பு அமைகிறது. தொடர்ந்து வேடர் குலத்தைச் சார்ந்த திண்ணனார் அணிந்த குறிப்புப் பெரியபுராணத்தில் இடம் பெறுகிறது. எனவே குறிப்பிட்ட இனத்தார் தாங்கள் அரிதிற் பெற்ற பொருளைக் கொண்டு தங்கள் குழந்தைகள் புலிப்பல்லை பார்க்கும்போது, வீர உணர்வைப் பெறுவர் என்ற நம்பிக்கை அடிப்படையிலும் இதனை அணிவித்தனர் என்று இலக்கியங்களின் மூலம் அறிய முடிகிறது.

       புலித்தோல், புலிநகம், புலிப்பல் ஆகியவை மக்களால் பயன்படுத்தப்படுவதை இன்றும் வழக்கில் காண்கிறோம். இன்று இருபாலரும் புலிநகம், புலிப்பல் அணியும் நிலை அழகு கருதியே பெரும்பாலும் அமைகிறது.

பார்வை நூல்

1.  காப்பியங்களில் பழக்கவழக்கங்களும் நம்பிக்கைகளும் – முனைவர் புலவர் சீ.வசந்தா, எம்.ஏ., எம்.எட்., ஸ்ரீவித்யா பதிப்பகம், சென்னை -600 082.