நவராத்திரி விழா

 

நவராத்திரி விழா

          மூன்று மூர்த்திகள், நான்கு வேதங்கள், ஐம்புலன்கள், ஆறு சாஸ்திரங்கள், பதினான்கு உலகங்கள், இருபத்தியேழு நட்சத்திரங்கள் என்று வகுத்த நம் முன்னோர்கள்: கலைகள் அறுபத்தி நான்கு என குறிப்பிட்டுள்ளார்கள்.

·        நவராத்திரி விழாவே ஒரு கலை விழாதான். கொலு வைக்கும் மங்கையரின் நுண்ணறிவை வியக்க வைக்கிறது.

·        ஒன்பது நாட்கள் இரவில் வீட்டையே கோயிலாக்கித் தெய்வீகம் தவழும் திருவிடமாக்கித் திகழும் மகளிர்க்கு இவ்விழாவில் பங்குண்டு.

·        இந்த ஒன்பது நாட்களும் காலையில் நீராடி வழிபாடு நடத்துவதுடன்; ஒவ்வொரு நாளிலும் கன்னிப் பெண்களை (2 வயது முதல் 10 வயது வரை) கல்யாணி, ரோகிணி, காளிகா, சண்டிகா, சாம்பவி, துர்கா, சயத்திரா, குமாரி, திரிமூர்த்தி என்ற இறைவனின் கூறுபாடுகளாகப் பாவித்து வணங்கி, உணவு உடை, அணிகலன்கள் முதலியன வழங்க வேண்டும்.

·        அவ்வாறு இயலாதவர்கள் லலித சகஸ்ர நாமம், சகலகலாவல்லி மாலை, அபிராமி அந்தாதி, மீனாட்சி யம்மைப் பிள்ளைத் தமிழ் ஆகிய சமய இலக்கியங்களைக் கற்றும் கேட்டும் களிப்படையலாம்.

·        இந்த நவராத்தியின் போது வங்களாத்தில் காளி பூஜையும், உத்திரப் பிரதேசம், பஞ்சாப் ஆகிய இடங்களில் ராமலீலையும், மைசூரில் சாமுண்டீஸ்வரி பூசையும் தமிழ்நாட்டில் கமைகள் பூசையும் நடக்கின்றன.

·        கொலு தொடங்கிய நாள் முதல் ஒவ்வொரு மாலை நேரத்திலும் இளஞ்சிறுவர்கள், பல்வேறு விதமாகத் தன்னை அன்றன்றும் ஒப்பனை (மேக்கப்) செய்து கொண்டு கலை ஒளி வீச, காற் சதங்கை ஒலிக்க, குங்குமச் சிமிழுடன் பிறர் இல்லம் சென்று அழைப்பு நல்கும் காட்சி, நெஞ்சை மயக்கும் வண்ணம் இருக்கும்.

·        உலகங்களையும் உயிரினங்களையும் படைத்தளித்த உலக மாதாவை இந்த ஒன்பது இரவுகளிலும் வழிபடுவது மிகவும் சிறப்புடையது.

·        ஒன்பது இரவுகள் சக்தியாகத் திகழ்ந்தவள், பத்தாம் நாள் சிவத்துடன் சேர்ந்து கலந்து சிவசக்தியாக மாறிவிடுகிறாள்.

·        புராணக் கதைகளில் ராமபிரானின் மூதாதையர்களின் ஒருவர்தான் இவ்விழாவை முதன்முதலில் கொண்டாடியிருக்கிறார்.

·        இந்த நவராத்திரி விரத்த்தை வருஷ ருது தாண்டி சரத் ருதுவான ஐப்பசியில் , வசந்த ருதுவான் சித்திரையில் செய்ய வேண்டும்.

·        இந்த இரு பருவங்களும் காலனுடைய கோரப் பற்களாகும். இவ்விரு காலங்களையும் உயிரினங்கள் கடந்து செல்வது கடினம். நோய்நொடிகள் இக்கால கட்டத்தில் வந்து சேரும். ஆகவே, இக் கொடுமையிலிருந்து உயிர்கள் மீளவே சண்டிகையின் பூசை செய்ய வேண்டும் என்கிறார் ஜனமே ஜெயனிடம் வாசர்.

·        இந்த நவராத்திரி காலங்களில் 9 நாட்களும் ஒன்பது வடிவில் காட்சி தருகிறார் அம்மை

·        வீட்டில் பெரும்பாலும் கொலு வைப்பதற்கு கொலு படிகட்டுகள் வைத்து அதில் 3-5-7-9 என்ற ஒற்றைப்படை எண்ணிக்கையில் படிவைத்து அதில் கொலு வைப்பார்கள்.

·        நவராத்திரியின் வழா நாட்களில் ஊசி நூல் கொண்டு தைக்க மாட்டார்கள். வீட்டை ஒட்டடை அடிக்க மாட்டார்கள்.

·        இந்த ஒன்பது நாட்களும் வீடு ஆலயமாகும். நம் மனமோ தெய்வீகமாகும். ஒன்பது நாளைய அருள்வழி பாட்டில் துர்க்கை நம்மீது அருள்வழிப் பாட்டில் துர்க்கை நம்மீது அருளை பொழிவாள்.  அறிவைப் புகட்டுவாள். ஆணவம் போக்கி ஆனந்தம் ஊட்டுவாள்.

·        பக்தி இலக்கியங்களும் பரம பாகவதரும் கூறும் அத்தனை சமய மேன்மைகளும் படியேறி வீடு வரும் நாட்கள் தான் இந்த ஒன்பது நாட்கள் நவராத்திரி.

பார்வை நூல்கள்

1. பண்டிகை தரும் பண்பாடு - திருமதி கோ. சாந்தகுமாரி, எழில் நிலா பதிப்பகம், மயிலை, சென்னை -4.