நாட்டார் உணவுகள்

 

நாட்டார் உணவுகள்

          நாட்டார் உணவுகள் என்பது ஆதிமனிதன் உணவுப் பழக்கவழக்கங்களின் தொடர்ச்சியாகும். நெருப்பைக் கண்டுபிடிக்காத காலத்தில் ஆதிமனிதன் பழங்களையும், காய்களையும் இலைதழைகளையும் பூக்களையும் பச்சையாகவே சாப்பிட்டு வாழ்ந்து வந்தார்கள். இன்றும் குரங்குகள், அடர்ந்த வனங்களில் காய், கனிகளை மட்டும் சாப்பிட்டு உயிர் வாழ்வதைக் காண்கின்றோம்.

     கிராமங்களில் மக்களின் உணவுகள் இன்றும் வேக வைக்காத, சுடாத உணவுகள் இடம் பெற்றுக் கொண்டுள்ளது.

·        காலை எழுந்தவுடன் பதநீர் குடிப்பது, பதநீரோடு நுங்கையும் கலந்து சாப்பிடுவார்கள். இவ்வாறு காலையில் சாப்பிட்டால் மதியம் வரை பசிக்காது. பதநீர் குடிப்பதால் உடல் சூடு தணிகிறது. தென்தமிழகத்தில் பனைமரங்கள் மானவாரியாக விளைகின்றன.

·        மாலையில் இளநீருடன் வழுக்கையையும் சாப்பிட்டால் ருசியாக இருக்கும். தினமும் காலையில் பதநீரும், மாலையில் இளநீரும் சாப்பிடுபவர்கள் இன்றும் கிராமங்களில் வாழ்ந்து கொண்டு இருக்கிறார்கள்.

·        காலையும் மாலையும் பசுவின் பாலை மடியில் கறந்தவுடன் இளஞ்சூட்டில் குடிப்பார்கள்.

·        பெண்கள் காடுகளுக்கு வேலைக்குப் போகும் போது ஒரு ‘கூட்டு’ தயாரிப்பார்கள். அந்தக் கூட்டு சாப்பிட உப்பும் உறைப்புமாக இருக்கும். வெங்காயத்தைப் பொடிப் பொடியாக முதலில் நறுக்கி ஒரு பாத்திரத்தில் போடுவார்கள். அத்தோடு ஒன்றிரண்டு மிளகாய் நறுக்கி, பிறகு தக்காளிப் பழத்தை நசுக்கி அதே சட்டியில் போடுவார்கள். அத்தோடு சிறிது மல்லி இலை, கருவேப்பிலை இலை போட்டு உப்பும் சேர்த்து நொறுங்கப் பிணைவார்கள். அனைத்து சேர்த்து உப்பு, உறைப்பு, புளிப்பு, கரிப்பு என அனைத்துச் சுவையுடன் கூட்டு தயாராகிவிடும். இந்தக் கூட்டு சமைக்காத கூட்டாகும்.

·        முளைக் கட்டிய பயறு, கொண்டைக் கடலை போன்றவற்றையும் பச்சையாகச் சமைக்காமலே சாப்பிடலாம்.

·        பிரண்டைச் செடியின் தளிர் தண்டுடன் உப்பும் மிளகாயும் புளியும் சேர்த்துக் கல்லில் வைத்து, காடு கரைகளில் நசுக்கி ஒருவித ‘துவையல்’ செய்வார்கள். இது சிறந்த மருத்துவ குணம் கொண்டது.

·        பிஞ்சு மிளகாய், வெங்காயத்தின் மேல் தோலை உரித்துவிட்டு அப்படியே மென்று தின்று கஞ்சி குடிப்பதும் இன்றும் நடைமுறையில் உள்ள பழக்கமாகும்.

·        நனைய வைத்த பச்சரிசியுடன், தேங்காய் துண்டுகளும், வெல்லமும் சேர்த்து பண்டமாகச் சாப்பிடுவர்.

·        இளம் கம்மங்கதிர், தினைக்கதிர், சோளக்கதிர் போன்றவற்றைக் கசக்கி அதிலிருந்து வெளிவரும் முற்றாத தானியங்கள் சாப்பிட சுவையாக இருக்கும்.

தீயில் சுட்ட உணவுகள்

ஆதிமனிதன் நெருப்பைக் கண்டுபிடித்தப்பின் சுட்டுச் சாப்பிடக் கற்றுக் கொண்டான். தீயில் சுட்ட உணவு சுவையாக இருப்பதாலும், எளிதாக சீரணம் ஆவதாலும் சில காய்களையும், கிழங்கு வகைகளையும் சுட்டுச் சாப்பிட்டான்.

·        சீனிக் கிழங்கு, பனங்கிழங்கு, மீன் போன்றவற்றை உப்புக் கலந்தும் கலக்காமலும் சுட்டுச் சாப்பிட்டான். இன்றும் காடுகளில் சுட்டு உண்கின்றனர்.

·        கத்திரிக்காயைத் தீக்கங்குகளின் மேல் போட்டுச் சுட்டு, அதன் தோலை நீக்கிவிட்டுச் சதைப் பற்றான பகுதியுடன் பச்சை மிளகாயும், வெங்காயமும் உப்பும் சேர்த்துப் பிசைந்து ஒருவிதக் கூட்டுத் தயாரித்து வெஞ்சனமாகச் சாப்பிடுவார்கள்.

·        காட்டில் கிடைக்கும் பிராணிகளின் மாமிசத்தின் மேல் உப்பும் மிளகுவத்தல் தூளும் கலந்த கலவையைத் தடவி அதை அப்படியே தீயில்  இட்டு சாப்பிடும் வழக்கம் உள்ளது.

அவித்து உண்ணுதல்

·        பச்சை மொச்சைக் காய், துவரங்காய், மொச்சைக்காய் போன்றவற்றை ஒரு சட்டியில் போட்டு, அதில் சிறிது நீருற்றி அடுப்பில் வைத்து அவித்து அத்துடன் சிறிது உப்பும் சேர்த்துச் சாப்பிடலாம். இவை சுவையான சத்துள்ள உணவு பண்டமாகும்.

வறுத்து சாப்பிடுதல்

·        சோளக் கதிரை தீயில் வாட்டிய பின் கதிரைக் கையில் வைத்துக் கசக்க, சுட்ட சோள மணிகள் கீழே உதிரும். அதை மடியில் திரட்டி சாப்பிடலாம்.

·        பயறு வகைகளை ஓட்டில் போட்டு வறுத்து அதில் உப்புக் கலந்த தண்ணீரைத் தெளித்து ஆறவைத்துச் சாப்பிடலாம்.

·        பச்சரிசியையும் புழுங்கல் அரிசியையும் வறுத்து சாப்பிடலாம்.

மேலே கண்ட உணவுப் பழக்கங்களும், ஆதிமனிதனிடம் இருந்து தொடர்ந்து வரும் உணவு பழக்கங்களாகும்.

பார்வை நூல்கள்

1.   பக்தவத்சல பாரதி, தொகுப்பாசிரியர் – தமிழர் உணவு, காலச்சுவடு பதிப்பகம், நாகர் கோவில் – 629 001, பதிப்பு டிசம்பர் 2011.