அறிவியல் மேதை ஸ்டீபன் ஹாக்கிங்

 

அறிவியல் மேதை ஸ்டீபன் ஹாக்கிங் 

 

(ஸ்டீஃபன் ஹாக்கிங் அவர்களின் வாழ்க்கை வரலாற்றைப் பற்றி அறிந்து கொள்ள நீண்ட நாள் ஆசை. இன்று என் தோழி ‘அறிவியல் மேதை ஸ்டீஃபன் ஹாக்கிங் வாழ்க்கை வரலாறு’ என்ற நூலைக் கொடுத்தார். அதனால் என் ஆசை நிறைவேறியது. அவரின் வரலாற்றைச் சுருக்கமாக உங்களிடம் பகிர்ந்து கொள்கிறேன்.)

 

1942 – ஆம் ஆண்டு ஜனவரி 8 – ஆம் தேதி இங்கிலாந்தில் உள்ள ஆக்ஸ்போர்டு நகரில் நன்கு கல்வி கற்ற குடும்பத்தில் ஹாக்கிங் பிறந்தார். கணிதவியல் பாடத்தில் உயர்கல்வி படிக்க விரும்பிய இவருக்கு இயற்பியல் உயர்கல்வி படிக்கும் வாய்ப்புதான் கிடைத்தது. 1963 – ஆம் ஆண்டு முனைவர் பட்டப் படிப்பில் ஈடுபட்டிருந்த போது அவருக்கு 21 வயது. இவருக்கு திடீரென பேச்சுக் குன்றியது. நடை தடுமாற ஆரம்பித்தது. அவரைப் பரிசோதித்த மருத்துவர்கள் நரம்புகளின் இயக்கத்தைப் பாதிக்கக்கூடிய அரிய வகை மூளை தண்டுவட நோய் பாதிப்பு ஏற்பட்டு இருப்பதாகவும் இன்னும் இரண்டு ஆண்டுகளில் இறந்து விடுவார் என்றும் கூறி விட்டனர். ஆரம்பத்தில் இந்த தகவலை கேட்ட ஹாக்கிங்கிற்கு மனசோர்வு ஏற்பட்டது. இருப்பினும் தான் இறப்பதற்குள் முனைவர் பட்டத்தையாவது பெற்று விட வேண்டும் என்று மிகவும் கடுமையாக படித்து வந்தார்.

ஹாக்கிங் – ஜேன் வில்டே திருமணம்

            இந்த சமயத்தில் ஜேன் வில்டே என்பவரை காதலித்து திருமணம் செய்து கொண்டார். மூன்று குழந்தைகள் பிறந்தன. சோதனைக் கூடங்களில் இருந்து கொண்டு ஆராய்ச்சி செய்வதற்கு உடல்நிலை இடம் தராது என்பதால் கணக்கீடுகள் மூலம் இயற்பியல் கோட்பாடுகள் பற்றி ஆராய ஆரம்பித்தார். கருந்துளைகள், காலவெளி ஆராய்ச்சி ஆகியவற்றில் நிபுணத்துவம் பெற்றார். தளராத மனதுடன் உழைத்ததினால் ஆல்பர்ட் ஐன்ஸ்டீனுக்கு பிறகு மிகவும் திறமையான புகழ்மிக்க விஞ்ஞானியாக ஆனார் ஹாக்கிங். கருந்துளை பற்றிய இவரது ஆராய்ச்சி முடிவுகள் பலராலும் ஏற்றுக் கொள்ளப்பட்டு இவருக்குப் புகழ் சேர்ந்தது.

கருந்துளைகள்

            நட்சத்திரங்களுக்குள் இருக்கும் எரிபொருள் தீர்ந்து போனதும் அங்கிருந்து வெப்பமும் ஒளியும் உருவாவது நின்று விடும். பிறகு, காற்று போன பலூன் சுருங்குவதை போல நட்சத்திரமானது தன்னுடைய ஈர்ப்பு விசையின் காரணமாக தனக்குள்ளேயே சுருங்க ஆரம்பித்து விடும். இந்த உள்ளீர்ப்பு சக்தி அளப்பரியதாக இருப்பதால் உயிரழந்த நட்சத்திரம் தன்னை தானே முழுவதுமாக உள்ளிழுத்துக் கொண்டு மிகச் சிறிய அளவிற்குள் நெருக்குமாக சுருங்கி விடும். இத்தகைய நிலையே கருந்துளையாகும்.

            உயிரிழந்த நட்சத்திரங்களின் கல்லறைகளே கருந்துளைகள். நம்முடைய பூமியின் அளவு கொண்ட நட்சத்திரம் கருந்தளையாகி விட்டால் இரண்டு சென்டி மீட்டர் விட்டம் கொண்டதாக சுருங்கிப் போய்விடும். சூரியனின் அளவுடைய நட்சத்திரம் கருந்துளையாகும் போது 3 கிலோ மீட்டர் ஆரம் கொண்ட கருந்துளையாகி விடும். ஒரு விநாடிக்கு 2,99792 கிலோ மீட்டர் தூரம் பயணிக்கக் கூடிய சக்தி மிக்க ஒளிபட இதன் அருகே செல்லும் எதுவுமே இதன் ஈர்ப்பு விசையிலிருந்து தப்பிக்க முடியாது. இத்தகைய கருந்துளைகள் வெவ்வேறு அளவுகளில் ஒரு கோடி முதல் 100 கோடி வரையிலும் நமது பால் வீதி மண்டலத்தில் இருக்கின்றன என்று விஞ்ஞானிகள் கணிக்கின்றனர்.

            ஈர்ப்பு விசை மிக கடுமையாக இருப்பதால் கருந்துளைகளுக்கு உள்ளேயிருந்து எதுவுமே வெளியேறி வரமுடியாது என்று தான் கருதப்பட்டு வந்தது. ஆனால் தனது ஆராய்ச்சியின் போது ஹாக்கிங் போட்டு பார்த்த கணக்கீடுகள் ஆச்சிரியமூட்டும் முடிவினை வெளிப்படுத்தின. கருந்துளைகள் தங்களிடம் இருக்கும் சக்தியை மிகமிக நீண்ட நெடிய காலப்போக்கில் மிகவும் சிறிது சிறிதாக இழக்கின்றன. இந்த சக்தி ஆற்றல் துகள்களாகவும், வெப்பக் கதிர்களையும் மிக நுண்ணிய அளவுகளில் வெளிப்படுகிறது என்று ஹாக்கிங் கண்டுபிடித்தார். இதற்கு ‘ஹாக்கிங் கதிரியக்கம்’ என்று பெயரிடப்பட்டது.

            அடர்த்தி, வெப்பம், அழுத்தம், காலம், வெளி ஆகிய அனைத்து பண்புகளும் ஒன்றாக சுருங்கி சின்னஞ்சிறு உள்மையமாக ஒரு ஒற்றை புள்ளியின் ஒருமை தன்மையுடன் எஞ்சி நிற்கும் கருந்துளைகளின் இத்தகைய நிலை பற்றி ஹாக்கிங் செய்த கணக்கீடுகள், உலக அளவில் இவருக்குப் புகழைத் தேடித் தந்தன. கற்பனைக்கு எட்டாத தொலைவுகளில் இருக்கும் கருந்துளைகளில் மிக மிக குறைவான வேகத்தில் நீண்ட நெடிய காலத்திற்கு நடைபெறக் கூடிய நிகழ்வுகளை தனது கணித ஆற்றலை கொண்டு சிந்தித்துக் கண்டவர் ஹாக்கிங்.

ஹாக்கிங் – நோய்

            ஸ்டீபன் ஹாக்கிங் தனது பட்டப்படிப்பைப் படித்து வந்தார். அப்போது அவருக்கு அமியோட ரோபிக் லேடர்ஸ் ஸ்களீரோசிஸ் என்னும் நோய் இருப்பது கண்டுபிடிக்கப்பட்டது. இந்த பிரச்சினை அவருக்கு பதிமூன்று வயதிலிருந்தே இருந்தது. ஆனால் இருபத்தியொரு வயதில் உறுதியானது. இந்த நோய் உள்ளவர்கள் அடிக்கடி கீழே விழுவார்கள். தசைகள் தன்னிஷ்டப்படி இயங்கும். இதயம், நுரையீரல், கிட்னி போன்றவை தாமாகவே இயங்கும். சாப்பிடுவது என்பது சிரமமாகவே இருக்கும். அவர்கள் வாழ்நாளும் அதிக நாட்கள் நீடிக்காது. இறுதியில் அவரது வாழ்க்கையில் சக்கர நாற்காலி அறிமுகமானது.

            ஹாக்கிங் ”எப்படி இருந்தாலும் நான் இறக்கப் போகிறேன். அதற்குள் சில நன்மைகளை செய்ய வேண்டுமென்பது என் எண்ணமாக இருந்தது. ஆனால் இந்த நிமிடம் வரை நான் இறக்கவில்லை. உண்மையில் நான் என் கடந்த காலத்தை விட நிகழ்காலத்தில் மகிழ்ச்சியாக என் வாழ்க்கையை அனுபவித்துக் கொண்டிருக்கிறேன்.”

ஹாக்கிங் உடல்நிலை

            1985 – இல் அவருக்கு நிமோனியா தாக்கி மூச்சுக் குழாய் அறுவை சிகிச்சைக்குப் பிறகு அவருக்கு இருபத்தி நான்கு மணி நேர மருவத்துவ பராமரிப்பு தேவைப்பட்டது. ஒரு குறிப்பிட காலம் வரை தனது கருத்துக்களை மற்றவர்களிடம் கூற காகிதத்தில் எழுதிக் காட்டுவார். மற்றவர்கள் கேட்கும் கேள்விகளுக்கு பதிலும் எழுத்து வடிவத்தில் தான். அடிப்படை உரையாடலையே இவ்வளவு கடினமாக மேற்கொள்ள வேண்டியிருக்கும் போது தன்னால் அறிவியல் கட்டுரைகளை தனது உதவியாளரைக் கொண்டு எழுத முடியும்? மற்றவர்கள் கேள்விகளை புரிந்து கொண்டு எப்படி பதிலளிக்க முடியும்? இது மாதிரி பல கேள்விகள் ஸ்டீஃபன் ஹாக்கிங் முன் நின்றது.

            தனது வாழ்க்கையை மிகவும் அர்த்தமானதாக மாற்ற முடியும் என்பதே இவர் எண்ணமாக இருந்தது.

            கேம்பிரிட்ஜ் பல்கலைக் கழகத்தைச் சேர்ந்த டேவிட் மேசன் ஒரு சிறிய கணினியுடன் வந்தார். அது ஒரு நிமிடத்திற்கு பதினைந்து வார்த்தைகளை நிர்வகிக்க முடிந்தது. ஸ்டீஃபனால் தன் வார்த்தைகளை தனது கணினியில் சேமிக்க முடியும். அவர் தேர்ந்தெடுத்து தொகுத்த வார்த்தைகளை அச்சிடலாம். தானும் கேட்கலாம். மற்றவர்களுக்கும் போட்டுக் கேட்க வைக்கலாம்.

ஹாக்கிங் - தன்னம்பிக்கை வாழ்க்கை

            ஹாக்கிங்கை மருத்துவர்கள் இரண்டு ஆண்டுகள் மட்டும் உயிரோடு இருப்பார் என்று சொல்லப்பட்ட போதிலும் அதற்கு பிறகு 55 ஆண்டு காலம் இவர் வாழ்ந்திருந்தார். கடுமையான நோய் இவரைப்  பற்றிப் பிடித்துக் கொண்டு ஆட்டி வைத்தது. 1985 – ஆம் ஆண்டு முதல் சக்கர நாற்காலியில் முடங்கிப் போனார். இவர் பேசுவதற்கென்று சிறப்பாக உருவாக்கப்பட்ட கணினி மென்பொருள் இவரது கன்னத்துத் தசைகளின் அசைவுகளை புரிந்து கொண்டு அவற்றை சேர்த்து ஒருங்கிணைத்து அவர் பேச முற்படும் வார்த்தைகளைத் திரையில் காட்டும். அவற்றில் சரியானவற்றை ஹாக்கிங் சொடுக்கியின் துணை கொண்டு தேர்தெடுப்பார். இந்தக் கருவியின் துணை கொண்டுதான் தனது ஆராய்ச்சிகள் அனைத்தையும்  இவர் வெற்றிகரமாக முடித்தார்.

            எனக்கு ஏற்பட்டியிருக்கும் உடல்குறை பற்றி வருந்திக் கொண்டே இருப்பது வீண் வேலை. வாழ்க்கையில் எடுத்த காரியங்களில் வெற்றி காண வேண்டும். உங்கள் நிலைமைக்காக எப்போதும் புலம்பிக் கொண்டும் கோபப்பட்டு கொண்டும் இருந்தீர்கள் என்றால் அதையெல்லாம் கேட்பதற்கு யாருக்கும் நேரமில்லை என்று அவர் ஒருமுறை எழுதியிருக்கிறார். இவரது வாழ்க்கை ஒட்டு மொத்த மனித குலத்திற்கான ஒரு பாடம்.

பேச்சொலியாக்கிய முறை

            கை, கால் முடக்கத்தை அவரது அதி நவீனத் திறன் கொண்ட சக்கர நாற்காலி ஓரளவுக்கு ஈடு செய்வதென்றால், அவரது குல்லை மீட்டெடுக்க உதவியது Speech Syntynizer எனப்படும் பேச்சொலியாக்க  முறை கிட்டத்தட்ட முழுமையாக முடங்கி விட்ட ஹாக்கிங்கால் தனது முகத்தின் பகுதித் தசைகளை மட்டுமே சற்று அசைக்க முடியும் என்ற நிலை இருந்தது. இந்த அசைவுகளை கொண்டே அவருக்கு ஒரு குரலைக் கொடுத்திருந்தது தொழில்நுட்பம்.

            1997 – ஆம் ஆண்டு ஸ்டீஃபன் ஹாக்கிங்கின் சக்கர நாற்காலியில் இன்டெல் நிறுவனத்தால் உருவாக்கப்பட்ட ஒரு டேப்லெட் கணினி பொருத்தப்பட்டது. இதுவே நாம் கேட்ட ஸ்டீபன் ஹாக்கிங்கின் குரலுக்கு அடிப்படை.

            Word Plus என்ற நிறுவனம் உருவாக்கிய EZ Keys என்ற மென்பொருள் இந்த டேப்லெட் கணினியில் நிறுவப்பட்டிருக்கிறது. பேச்சொலியாக்கலுக்கான கிபோர்டைக் கொண்டிருக்கும் இந்த மென்பொருளை ஸ்டீஃபன் ஹாக்கிங் தனது கன்னத்தை அசைப்பதன் மூலம் கட்டுப்படுத்தினார். இந்த அசைவானது அவர் அணிந்திருக்கும் கண்ணாடியில் உள்ள அகச்சிவப்பு கருவி மூலம் உணரப்பட்டது. குறியீடுகளுக்காக உதடு மற்றும் புருவத்தையும் ஹாக்கிங் பயன்படுத்தினார்

ஹாக்கிங் – சாதனைகள்

·         ஹாக்கிங் தனது வாழ்நாளில் 39 பி.எச்.டி மாணவர்களுக்கு மேற்பார்வையாளராக இருந்திருக்கிறார்.

·         ஹாக்கிங் தன் சிறப்பான பணிகளுக்காக பல விருதுகள் வாங்கியுள்ளார். மேலும் அவரை கௌரவிக்கும் வித பல கட்டிடங்களுக்கும், அருங்காட்சியகங்களுக்கும் ஹாக்கிங் பெயரை வைத்தனர்.

·         கேம்பிரிட்ஜில் உள்ள ஒரு கட்டிடத்திற்கு “ஹாக்கிங் கட்டிடம்” என்றும், கனடாவில் உள்ள பெரிமீட்டர் இன்ஸ்டிடியூட்டிலுள்ள கட்டிடத்திற்கு ‘ஸ்டீபன் ஹாக்கிங் கட்டிடம்’ என்று பெயர் வைத்து அவர் பணியின் சிறப்புக்கு மேலும் கௌரவம் சேர்த்தனர்.

ஹாக்கிங் - புத்தகங்கள்

            ஸ்டிஃபன் ஹாக்கிங் தன்னோட இயலாமை நிலையிலும் பல்வேறு புத்தகங்களையும், கட்டுரைகளையும் எழுதியுள்ளார்.

·         ஏ பிரீஃபிக் ஹிஸ்டரி ஆப் டைம் (1988)

·         கருப்பு துளைகள் மற்றும் இளம் பிரபஞ்சங்கள்

·         தி ஹார்ட் டெஸ்ட்  ஹிஸ்டரி ஆஃப் டைம் (2005)

·         ஜார்ஜ் அண்ட் தி சீக்ரெட்ஸ் ஆப்த யுனிவர்ஸ் (2006)

·         தி வேர்ல்ட் இஸ் இன் எ நட்ஷெல் (2001)

ஹாக்கிங் – விருதுகள்

·         ஆடம்ஸ் பரிசு (1966)

·         எடிங்டன் பதக்கம் (1975)

·         மாக்கவெல் பதக்கம் பரிசு (1976)

·         ஜன்மேன் பரிசு (1976)

·         ஆல்பர்ட் ஐன்ஸ்டைன் விருது (1978)

·         அரச வானியல் கழக தங்கப் பதக்கம் (1985)

·         திராக பதக்கம் (1987)

·         ஊல்ஃப் பரிசு (1988)

·         கோப்ரி பதக்கம் (2006)

·         அடிப்படை இயற்பியல் பரிசு (2013)

·         அட்ரியஸ் இளவரசரின் இலக்கிய பரிசு (1989)

·         ஜனாதிபதி பதக்கம் சுதந்திரம் (2009)

·         இங்கிலாந்து அரசின் உயரிய விருதான கமோண்டர் விருது (1982)

·         கம்பேனியன் ஆஃப் ஹானர் விருது (1989)

ஹாக்கிங் – மறைவு

            ‘தன்னுடைய மிகப்பெரிய சாதனையே தான் உயிருடன் வாழ்வதுதான்’  என்று ஒரு முறை ஸ்டீபன் ஹாக்கிங் கூறியிருக்கிறார். அவர் கூறியது சாதாரண வார்த்தை அல்ல. அதில் எவ்வளவு வேதனை, வலி உள்ளது என்பதை நம்மால் உணர முடிகிறது. அதை பெருமைக்கும், போற்றுதலுக்கும் உரிய ஒரு அறிவியல் அறிஞர் சொல்லுவதை கேட்கும் போது நம் கண்கள் கலங்குகின்றன. அன்றாடம் செத்து பிழைப்பதாக சொல்வார்களே அப்படிதான் வாழ்ந்திருக்கிறார் ஸ்டீஃபன் ஹாக்கிங்.

            ஸ்டீஃபன் ஹாக்கிங் 2018 – ஆம் ஆண்டு மார்ச் 14 அன்று இயற்கை எய்தினார். இறக்கும் போது அவருடைய வயது 76.

            உலகில் வாழ்கின்ற பல மாற்றுத் திறனாளிகளுக்கு இவர் வாழ்க்கை கண்டிப்பாக ஒரு உத்வேகத்தைத் தரும்.

ஸ்டீஃபன் ஹாக்கிங் – பொன்மொழிகள்

·         கீழ்நோக்கி உங்கள் பாதத்தைப் பார்க்காதீர்கள். மேல்நோக்கி நட்சத்திரங்களைப் பாருங்கள்.

·         நாம் பேராசை மற்றும் மூடத்தனத்தின் மூலம் நாம் நம்மை அழித்துக் கொள்ளும் அபாயத்தில் இருக்கிறோம்.

·         நீங்கள் எப்போதும் கோபமாகவோ, அல்லது குறை கூறிக் கொண்டோ இருந்தால் உங்களுக்கான நேரம் மற்றவர்களிடம் இருக்காது?

·         அமைதியான மக்கள் சுத்தமான மனதைக் கொண்டிருக்கிறார்கள்.

·         மனித முயற்சிக்கு எவ்வித எல்லைகளும் இருக்கக் கூடாது.

·         உழைப்பு இல்லாத வாழ்க்கை வெறுமையானது.

·         வாழ்க்கை உள்ளவரை நம்பிக்கைக்கும் இடம் உண்டு.

·         எனக்கு கடவுள் மிது பயம் இல்லை. அவரை நம்பியவர்கள் மேல்தான் பயம்.

பார்வை நூல்

1.    அறிவியல் மேதை ஸ்டீஃபன் ஹாக்கிங் வாழ்க்கை வரலாறு – ஜெயகுமாரி, மினர்வா பப்ளிளேஷன்ஸ், சென்னை – 600 005.